Jeta Dida Bujari, e lindur më 15 tetor 1976 në Prishtinë, është pianiste, pedagoge e pianos dhe menaxhere arsimore me mbi dy dekada përvojë në kulturë, arsim dhe udhëheqje institucionale.
Ajo vjen nga një familje e njohur arsimdashëse, e cila ka kontribuuar në mënyrë të vazhdueshme që nga paslufta 1945 në zhvillimin e arsimit dhe kulturës në Kosovë. Që në fëmijëri e lidhi jetën me pianon, duke u formuar si pianiste e dalluar në klasën e prof. Lejla Pula. Gjatë studimeve ishte themeluese e Shoqatës së artistëve të rinj, iniciativë kulturore që mbështeti vazhdimësinë e jetës artistike gjatë viteve të 90-ta.
Si interprete, ka marrë pjesë në koncerte dhe festivale të rëndësishme brenda dhe jashtë vendit, duke promovuar repertorin shqiptar dhe atë ndërkombëtar. Për 17 vite ka punuar si autore e emisioneve në “Radio Kosova”, duke udhëhequr emisione kulturore që promovonin artin, letërsinë dhe krijimtarinë muzikore në përgjithësi.
Në fushën e arsimit, që nga viti 2005 Jeta është profesoreshë e pianos në Shkollën e muzikës “Prenk Jakova”, ku për disa mandate ka qenë shefe e seksionit piano–instrumental. Nxënësit e saj janë fitues të çmimeve të shumta kombëtare dhe ndërkombëtare.
Në vitin 2020 u emërua U.D e drejtoreshës së shkollës “Prenk Jakova”, ndërsa një vit më vonë u konfirmua si drejtoreshë e rregullt. Nën udhëheqjen e saj, shkolla është shndërruar në institucion model në vend, falë bashkëpunimeve strategjike brenda dhe jashtë Kosovës, aktiviteteve kulturore me ndikim artistik, social dhe humanitar, zhvillimit profesional të stafit dhe nxënësve, avokimit të suksesshëm për investime dhe donacione, promovimit të gjithëpërfshirjes dhe mbështetjes për fëmijët me aftësi të ndryshme.
Ajo është bashkëautore e teksteve shkollore “Edukata Muzikore 2” dhe “Edukata Muzikore 3”, të përzgjedhura nga MASHT për përdorim në shkollat fillore të vendit.
Ka shërbyer në disa trupa dhe këshilla profesionale, përfshirë Këshillin drejtues të Teatrit “Oda” dhe Trupën Këshilldhënëse të Fakultetit të Muzikës “Haxhi Zeka” në Pejë. Aktualisht është nënkryetare e Trupës këshilldhënëse në Fakultetin e Arteve të UP-së.
Me përvojën e saj të gjerë, vizionin profesional dhe angazhimin publik, Jeta Dida Bujari synon të kontribuojë në zhvillimin e politikave kulturore, edukative dhe sociale, me fokus te rinia, talentet e reja, barazia dhe gjithëpërfshirja. Në zgjedhjet e fundit komunale, Jeta ishte asambleistja më e votuar grua nga të gjitha partitë politike në Prishtinë dhe Kosovë.
