Këshilli i drejtorëve i Komunës së Prishtinës, në këtë mbledhje shqyrtoi gjendjen aktuale të kuzhinave dhe bufeve në shkollat fillore dhe të mesme të komunës së Prishtinës.
Lidhur me këtë çështje Këshilli i drejtorëve mori vendim për mbylljen e të gjitha kuzhinave dhe bufeve në shkollat ë komunës së Prishtinës. Arsyeja e vendimit për mbylljen e tyre vjen si pasoje e skadimit të kontratave ndërmjet kontraktuesve dhe Komunës së Prishtinës.
Ky vendim do të fillojë së zbatuari brenda javës së ardhshme. Njëkohësisht udhëheqja e komunës së Prishtinës, iu bënë thirrje të gjithë prindërve që fëmijëve të tyre të përfshirë në procesin shkollorë, t’u përgatisin shujtën e ushqimit me vete, ku ata do të kenë mundësin të ushqehen gjatë pushimit të gjatë, me qëllim që nxënësit të mos largohen nga hapësirat shkollore.
Drejtori i drejtorisë për Shërbime Publike Agim Gashi, para Këshillit të drejtorëve prezantoi punën e drejtorisë së tij, bërë gjatë këtyre ditëve, ku janë evidentuar një numër i madh i objekteve të përkohshme si shkallë, objekteve reklamuese, bankomatet, stenda, antena të ndryshme, objektet lëvizëse etj, pa leje të organeve komunale.
Lidhur me këtë Këshilli i Drejtorëve i Komunës së Prishtinës mori vendim që deri më 15 prill 2010, të behet largimi i tërësishëm i këtyre objekte dhe lirohen hapësirat publike.
Po ashtu do largohen edhe objektet tjera të përkohshme që posedojnë leje nga organet komunale, por që nuk i kanë shlyer borxhet ndaj komunës, nëse një gjë të tillë nuk e bëjnë gjatë këtij muaji.
Ndërkaq, do të ndërmerren masa edhe për inkasimin e të hyrave nga shfrytëzimi i hapësirave publike, shfrytëzuesit e të cilave nuk i kanë përmbushur obligimet ndaj komunës.
Për këtë Këshilli i drejtorëve formoi një komision prej tri drejtorive përkatëse të cilët do të fillojnë punën që nga nesër më datë 17 mars.
Këshilli i drejtorëve diskutoi edhe çështje tjera operative në kuadër të planifikimeve për fillimin e realizimeve të projekteve të parapara për këtë vit.
Këshilli i drejtorëve i Komunës së Prishtinës, nën udhëheqjen e kryetarit Isa Mustafa, në mbledhjen e sotme diskutoi dhe miratoi disa vendime sipas pikave të rendit të ditës të parapara për këtë mbledhje.
