Isa Mustafa, kryetari Komunës së Prishtinës, i cili e ka hapur tubimin ka folur për rëndësinë e takimit.“Ky takim do të jetë i frytshëm dhe i rëndësishëm për ne”, ka theksuar kryetari Mustafa, duke ua lënë hapësirën të tjerëve që të vazhdojnë me debatin.
Të pranishëmve u janë drejtuar edhe Enver Hasani, kryetar i Gjykatës Kushtetuese të Kosovës, Altay Surroi, gjyqtar i Gjykatës Kushtetuese, Gjylieta Mushkolaj po ashtu gjyqtare e kësaj Gjykate si edhe nga e njëjta pozitë edhe ndërkombëtari, Almiro Rodrigues.Të gjithë këta kanë sqaruar rolin e Gjykatës Kushtetuese, gjithnjë me fokus se kjo Gjykatë dallon nga gjykatat e tjera, pasi që roli i saj është interpretimi dhe mbrojtja e Kushtetues së Republikës së Kosovës.
Nga ana tjetër ata kanë shpjeguar edhe për rolin dhe autorizimet e komunave për të parashtruar kërkesa pranë kësaj Gjykate. Në vazhdim të pranishmit kanë shtruar pyetje të ndryshme në adresë të referuesve nga Gjykata Kushtetuese.
Remzi Salihu, drejtor i Drejtorisë së Arsimit është interesuar të dijë për rolin e kësaj Gjykate në raport me bartjen e uniformës fetare në shkolla, për çfarë siç është shprehur ai, Komuna ka nxjerrë një rregullore, e bazuar në Ligjin për Arsimin e shkollimit fillor dhe të mesëm, që ka të bëjë me sjelljen e nxënësve nëpër shkolla.
Sami Hamiti, ndërkaq, është interesuar për Ligjin për Prishtinën, i cili sipas tij po zvarritet pa të drejtë nga Qeveria. Ky ka paralajmëruar edhe procedurë në Gjykatën kushtetuese për shkak të kësaj zvarritjeje.
Ka pasur edhe pyetje të tjera, ndërsa, përfaqësuesit e Gjykatës Kushtetuese kanë shpjeguar se për pyetjet që u janë shtruar, ata mund të përgjigjen vetëm nëpërmjet procedurave të paraqitura që më parë, sipas rregullave.
“Ne mund të marrim vendime vetëm nëse procedurat na adresohen neve për çështje të caktuara, ndërsa çdo përgjigje tjetër që mund ta bëjmë këtu mund të jetë interpretim personal dhe pa vlerë”, ka thënë Enver Hasani, kryetar i Gjykatës Kushtetuese.
Komuna e Prishtinës dhe Gjykata Kushtetuese e Republikës së Kosovës në bashkëpunim me East West Management Institute(EWMI), sot, në sallën e Kuvendit Komunal të Prishtinës ka mbajtur një takim konsultativ me këshilltarët komunalë dhe stafin tjetër të Komunës lidhur me procedurat për paraqitjen dhe shqyrtimin e kërkesave para Gjykatës Kushtetuese, nga ana e komunës.
