Hapet Qendra për Trajtimin e Qenve Endacakë në Prishtinë, një projekt që synon të adresojë problemin e qenve në rrugë dhe të përmirësojë mirëqenien e tyre.
Kryetari i Kryeqytetit, Përparim Rama, theksoi se qendra do të luajë një rol të rëndësishëm në sigurinë e qytetarëve dhe ka një kapacitet për të strehuar deri në 350 qen.
Kjo qendër është e pajisur me teknologji moderne dhe ka një staf të specializuar që përfshin një veterinar dhe dy teknikë veterinerë.
Qentë do të trajtohen falas gjatë gjithë jetës së tyre për ata që adoptohen dhe çdo pronar i qenit të adoptuar do të marrë 50 euro në muaj.
“Shumë shpejt do të fillojë bartja e qenve endacakë nga rrugët e kryeqytetit në këtë Qendër për trajtim, e më pas në pjesën e poshtme të Qendrës ku po finalizohet pjesa e strehimit për rreth 350 qen. Qentë do të mbahen në pjesën e strehimit deri në adoptimin e tyre. Siç është në dijeni opinioni, qentë të cilët adoptohen do të trajtohen falas në këtë Qendër për tërë jetëgjatësinë e tyre, si dhe pronarët do të marrin nga 50 euro në muaj për secilin qen të adoptuar nga kryeqyteti”, tha ai.
Rama bëri thirrje për mbështetje të mëtejshme nga Qeveria e Kosovës për të trajtuar problemin e qenve endacakë në nivel kombëtar dhe për t’i mbështetur komunat me resurse financiare dhe të tjera.
“I bëjmë thirrje Qeverisë së Republikës së Kosovës që të bëjë prioritet trajtimin e problemit të qenve endacakë në nivel të Kosovës, duke mbështetur komunat me resurse financiare dhe të tjera. Pa një angazhim të tillë, problemi nuk mund të zgjidhet në nivel nacional”, tha ai.
