Urdhëresë në të cilën thuhet: “Periudha Emergjente” nënkupton periudhën prej 1 qershor 2010 deri më 15 tetor 2010. Uji i pijshëm nënkupton ujin nga sistemi publik i furnizimit me ujë.
Çdo personi fizik ose juridik i ndalohet ta shfrytëzojë ujin e pijes për nevoja tjera, si për larjen e automjeteve, rrugëve, trotuareve, vendeve publike, shkallëve, ujitjen e bimëve dhe kopshteve.
Gjatë periudhës emergjente, në qoftë se ka rrjedhje të ujit të pijshëm në apo rreth lokaleve Komuna do të ketë të drejtën të ndërmarrë çfarëdo mase të arsyeshme që ta ndalojë humbjen e mëtutjeshme të ujit të pijshëm të shkaktuar nga rrjedhjet.
Në rrethanat, në të cilat është e arsyeshme të veprohet kështu. Komuna mund të dërgoj personin përgjegjës për të ndërmarrë masa për ndalimin e rrjedhjes së mëtutjeshme, në hapësirat ku rrjedh uji, në mënyrë që ndalojë humbjen e ujit të pijshëm.
Të gjitha shpenzimet e arsyeshme që dalin në rrethana të tilla, do të bartën nga pronari i lokalit.
Mbikëqyrja inspektuese lidhur me zbatimin e kësaj Urdhërese do ta bëjë Inspektorati komunal i Drejtorisë së Inspektoratit.
Ndaj çdo personi që keqpërdor ujin e pijes, do të pasojnë dënimet dhe masat tjera në bazë të dispozitave të kësaj Urdhërese. Me gjobë prej 100 € e cila arkëtohet në vendin e ngjarjes (gjoba mandatore), do të gjobitet për kundërvajtje personi fizik dhe pronari i dyqanit.
Ndërsa personat juridik do të gjobiten në gjobë prej 200 €, e cila arkëtohet në vendin e ngjarjes (gjobë mandatore), nëse veprojnë në kundërshtim me dispozitat kësaj Urdhërese.
Kjo urdhëresë është e nënshkruar nga kryetari i Komunës së Prishtinës, Isa Mustafa.
Për shkak të mungesës aktuale në sistemin publik të furnizimit me ujë të pijes, Komuna e Prishtinës ka parë të nevojshme t’i paraqesë masat e emergjencës, në mënyrë që të sigurojë mjaft ujë të pijshëm për popullatën gjatë stinës së verës.
