Koncept-dokumenti i Ligjit për Prishtinën – nga bashkësitë lokale deri të referendumi lokal

I pranishëm në hapjen e punimeve të kësaj punëtorie ishte edhe kryetari i Prishtinës, Shpend Ahmeti, i cili theksoi se “Kjo është kategori kushtetuese, është një prej ligjeve të pakta të cilat definohen në Kushtetutën e Republikës së Kosovës që nevojën për ta pasur ligjin për kryeqytetin e bën domosdoshmëri dhe nuk është ideja të diskutohet nëse ka nevojë për ligj, por diskutohet se çfarë ligji duhet ta ketë Prishtina. Në këtë kontekst është me rëndësi që të ndërtohet procesi i draftimit të këtij ligji, e pastaj nga ligji t’i nxjerrim politikat. Pra, të punojmë në nxjerrjen e politikave pastaj draftimin e ligjit ta marrim si një shërbim teknik juridik, i cili politikat i kthen në dispozita ligjore. Ideja është që të ndërtojmë një koncept dokument që më pas ekspertët juridik do ta përkthenin në ligj me qëllim që ky të jetë një ndër ligjet e para që do t’i trajtojë Kuvendi i Kosovës”, tha në hapjen e punimeve në këtë punëtori kryetari Shpend Ahmeti.
Kryetari Ahmeti u shpreh se ideja ka qenë që sponsorizues të jetë Ministria e Administrimit të Pushteti Lokal (MAPL), në bashkëpunim të ngushtë me Komunën e Prishtinës, me shoqërinë civile dhe ekspertë të tjerë të interesuar, me përfaqësues të donatorëve të cilët janë të interesuar për pushtetin lokal, me të cilët do të draftohet një koncept dokument që do të merr parasysh edhe nevojat dhe idetë e të grupeve të ndryshme të interesit.
“Për ne si Komunë e Prishtinës është me rëndësi që ta kemi një ligj ku planifikohen nevojat e Komunës edhe përtej nesh si administratë, pasi që ne politikanët jemi të përkohshëm, janë ligjet dhe administrata ato që mbesin, prandaj duhet menduar dhe punuar diçka që është afatgjate. Nga dispozitat e këtij ligji një pjesë ndoshta do të implementohej gjatë këtij mandati, e një pjesë tjetër do të mund të implementohej nga mandati i ardhshëm. Duhet ta kemi parasysh që ta kemi një ligj nga i cili s’do të kishim veç një ndarje të Prishtinës nga Ligji për Vetëqeverisje Lokale sepse në raste të tilla nuk do të bënim asnjë zgjidhje. Kudo që shkruan Komunë, veç si term do ta zëvendësonim me “Prishtinë”, por me të vërtetë ta konceptojmë si kryeqytet”, tha i pari i Komunës së Prishtinës, Shpend Ahmeti.
Pas këtij takimi do të punohet në finalizimin e koncept dokumentit do të prezantohet në një diskutim më të gjerë publik, ndërsa edhe partitë politike të përfaqësuara në Kuvendin Komunal do t’i shprehnin mendimet e tyre me qëllim të përpilimit të një ligji të mirëfilltë.
Kryetari Ahmeti theksoi se qëndrimi e Komunës së Prishtinës sa i përket koncept dokumentit është që në praktikë të shërbehemi me politikat e shteteve të tjera si model, por jo edhe tekstit dhe legjislacionin e tyre.
“Komuna e Prishtinës i ka 800 km katrorë. I kemi bashkësitë lokale për të cilat duhet të vendosim se si duhet të organizohen, sa anëtarë duhet t’i këtë Kuvendi Komunal dhe nëse i ka fuqitë më të theksuara ky kuvend në Prishtinë si kryeqytet e deri tek marrëdhëniet me pushtetin qendror. Financimi, granti specifik për kryeqytetin, nëse duhet të shkohet me grante apo të kërkohen metoda të tjera, si dhe me kompetenca shtesë që kryeqyteti i ka në krahasim me komuna të tjera sa i përket pavarësisë buxhetore. Marrëdhëniet me ndërmarrjet publike komunale, nëse duhet të ketë trajtim tjetër. Cilat janë relacionet me policinë, a duhet të ketë polici komunale të kryeqytetit për shkak të specifikave të cilat i ka si dhe deri tek kompetencat në sektorin e shëndetësisë, etj. Gjithashtu, mund të shikohet edhe mundësia e futjes së referendumit lidhur me çështjet lokale, në mënyrë që ta krijojmë një model demokratik dhe një ligj për kryeqytetin që do të shërbejë për disa kuvende në të ardhmen”, deklaroi Ahmeti.
Po ashtu, kryetari Ahmeti tha se duhet të parashihet nëse përpilimi i ligjit të Prishtinës mund të ketë efekt në ligjet e tjera dhe se është shumë i kënaqur që është arritur deri në këtë pikë, për të cilën gjë e falënderon edhe Ministrinë e Administrimit të Pushtetit Lokal (MAPL).
Ndërsa përfaqësuesi i MAPL, sekretari i përgjithshëm, Besnik Osmani u shpreh se edhe më parë kanë ekzistuar një seri draftesh për Ligjin e Prishtinës dhe se agjendën legjislative të vitit 2014 dhe se një gjë e tillë është obligim ligjor i MAPL.
“Ne në Ministrinë e Pushtetit Lokal nuk mund ta bëjmë një ligj të mirë pa ata që e dinë se si funksion Prishtina, prandaj që në ditën e parë jemi dakorduar me kryetarin Ahmeti që të kemi një grup të përbashkët i cili nuk do të punojë në ligj por në një dokument të politikave lidhur me organizimin e kryeqytetit. Andaj siç është praktikë e punës tonë, qysh në fazën e parë dëshirojmë të kyçim edhe sektorin jo publik që të jetë pjesë e grupit punues, në mënyrë që të kemi mendime edhe nga ata”, deklaroi Osmani, duke kërkuar që ligji për Prishtinën të ndërtohet mbi parimet kushtetuese.