“Jam i gëzuar që sot jam në mesin tuaj, e ardhmja e këtij vendi jeni ju, u tha kryetari Mustafa fëmijëve të fshatit SOS Kinderdorf, duke u uruar fëmijëve 1 Qershorin-ditën e tyre .“Ne si komunë jemi duke bërë përpjekje që për fëmijët te ndërtojmë këndë, parqe dhe kopshte, dhe do të përpiqemi që çdo kërkesë të fëmijëve ta realizojmë, tha kryetari Mustafa.
Fëmijët i përgëzuan për ditën e tyre drejtoresha e fshatit SOS Kinderdorf Nezahate Salihu, dhe donatori i projektit Hakif Gashi.
Kryetari i Prishtinës, me rastin e kësaj dite, i shoqëruar nga Avdullah Hoti, nënkryetar, Vlora Dumoshi , drejtoresh e Drejtorisë për Kulturë, Rini dhe Sport dhe Agim Gashi, drejtor i Shërbimeve Publike, Mbrojtjes dhe Shpëtimit, qëndroi në mesin e fëmijëve edhe në Bulevardin “Nëna Terezë”, ku Drejtoria e Kulturës, Rinisë dhe Sportit, kishte organizuar shumë aktivitete kulturore, dhe një program të pasur artistik, hapjen e të cilit e bëri kryetari i kryeqytetit, Isa Mustafa.
Në aktivitet morën pjesë këto grupe artistike të fëmijëve të Prishtinës; aktivitetet e fëmijëve me aftësi të kufizuara; Qendra Kulturore e Fëmijëve të Prishtinës; Grupet artistike të shkollave të Prishtinës; “Xixëllonjat”, “Mjellmat”, dhe grupe të ndryshme të valltarëve.
Ndërkaq, në orët e pasdite fëmijë prishtinas do të takohen këngëtaren artisten zvicerane Alexandra Prusa , ku do t’i shkruajnë dëshirat e tyre për mjedisin në të cilin jetojnë, si dhe do të kenë mundësi të bisedojnë me ambasadoren e nderit të UNICEF-it, Alyssa Milano.
Komuna e Prishtinës në bashkëpunim me OSBE-në, ka mbajtur një ligjëratë me fëmijët e kryeqytetit, ku është debatuar për të drejtat dhe liritë e fëmijëve.
Ndërsa në orën 19:30, fillon koncert i artistes Alexandra Prusa, në kuadër të projektit “KosovAmbient Song”, ku do të këndohen 20 këngë-dëshira të fëmijëve, të kompozuara nga kompozitorët Kosovarë, koncert i cili do të transmetohen drejtpërdrejt nga RTK-ja.
Kryetari i Komunës së Prishtinës, Isa Mustafa, sot, me rastin 1 Qershorit- “Ditës Ndërkombëtare të Fëmijëve “, bëri përurimin e parkut të lodrave për fëmijë në fshatin SOS Kinderdorf, në lagjen “Velani”. Projekt i cili është mbështetur nga kompania vendore “‘Meridian.”
